ម៉ៃសុត ទទួលស្វាគម៍គ្រប់ជើងខ្លាំងក្នុងទម្ងន់ ៦៣.៥គ.ក្រ ក្រោយយកឈ្នះ ឃីម ឌីម៉ា

បន្ទាប់ពីយកឈ្នះ ឃីម ឌីម៉ា ម្ចាស់មេដាយមាសព្រឹត្តិការណ៍ស៊ីហ្គេមឆ្នាំ ២០១៧ និងដណ្ដើមប្រាក់លានបានសម្រេចជាលើកទី ៣ ម៉ៃសុត ស៊ីតប៊ុនមី បានរក្សាជំហរទទួលស្វាគមន៍គ្រាប់ជើងខ្លាំង គុនខ្មែរ ក្នុងប្រភេទទម្ងន់ ៦៣.៥គ.ក្រ។ នេះជាការឆ្លើយតបភ្លាមៗទៅកាន់លោកពិធីករ ស៊ីថូណាថាន់ ដែលចោទសួរថា តើអ្នកប្រដាល់វ័យក្មេងរូបនេះចង់ជួបនរណាខ្លះ សម្រាប់ការប្រកួតបន្តបន្ទាប់ក្នុងទឹកដី កម្ពុជា។ ការយកឈ្នះ ឃីម ឌីម៉ា យប់មិញ កាន់តែធ្វើឲ្យអ្នករៀបចំកម្មវិធី គិតគូរយ៉ាងលំអិត ត្បិត ឌីម៉ា ជាស្ដេចត្រាញមួយរូបក្នុងប្រភេទទម្ងន់ ៦៣.៥គ.ក្រ នេះទៅហើយ។
   
សម្រាប់អ្នកប្រដាល់លំដាប់ជួរមុខរបស់ កម្ពុជា មានតែ ផល សោភ័ណ្ឌ មួយរូបគត់ដែលធ្លាប់យកឈ្នះ ម៉ៃសុត ក្រៅពីនេះ ឃីម ឌីម៉ា, ឡុង សំណាង, វេង សុភ័ក្រ ។ល។ សុទ្ធតែចាញ់គេទាំងអស់។ ក្នុងប្រភេទទម្ងន់ ៦៣.៥គ.ក្រ បច្ចុបន្ន នៅសេសសល់តែ ឡៅ ចិត្រា ម្ចាស់មេដាយសំរិទ្ធព្រឹត្តិការណ៍ស៊ីហ្គេម និងជាជើងឯកថ្នាក់ជាតិច្រើនសម័យ តែប៉ុណ្ណោះដែលមិនទាន់ប៉ះ ម៉ៃសុត។ ក្រោយការប្រកួតយប់មិញបញ្ចប់ មានបងប្អូនជាច្រើនសំណូមពរអ្នករៀបចំកម្មវិធីឲ្យផ្គូផ្គង ម៉ៃសុត និង ឡៅ ចិត្រា វិញម្ដង។ ឡៅ ចិត្រា កំពុងឡើងជើងខ្លាំងដោយផ្ដួលអ្នកលេងឆ្លងដែនសន្លប់ជាបន្តបន្ទាប់។ ប៉ុន្តែសិស្សគុនក្លឹប កងពលតូចពិសេសឆ័ត្រយោង៩១១ កំពុងជាប់រវល់ភារកិច្ចប្រជែងខ្សែក្រវាត់នៅឯស្ថានីយទូរទស្សន៍ បាយ័ន ដែលចំណាយពេលយ៉ាងតិច ៣ ខែទើបបញ្ចប់។ ដោយសមត្ថភាព និងស្នៀតប្រយុទ្ធសំបូរបែបរបស់ ឡៅ ចិត្រា អ្នកគាំទ្រ គុនខ្មែរ ជាច្រើនមានទំនុកចិត្តថា សិស្សប្អូនរបស់ ឡៅ ចន្ទ្រា រូបនេះ ពិតជាអាចយកឈ្នះលើ ម៉ៃសុត ស៊ីតប៊ុនមី បាន។ 

 ប្រភព៖ kunkhmer.net